అమ్మాయి... శిక్ష

తనపై అత్యాచారం జరిపిన ఆరుగురు అబ్బాయిలను శిక్షించిన ఓ అమ్మాయి కథతో మా చిత్రం తెరకెక్కిందన్నారు రామచంద్ర దోసపాటి. ఆయన కథానాయకుడిగా నటిస్తూ నిర్మించిన చిత్రం ‘అమ్మాయి ఆరుగురు’. ఆశాలత కథానాయిక. జి.మురళీప్రసాద్‌ దర్శకత్వం వహించారు. చిత్రాన్ని ఈ నెల 25న ప్రేక్షకుల ముందుకు తీసుకొస్తున్నారు. విలేకరుల సమావేశంలో రామచంద్ర దోసపాటి మాట్లాడుతూ ‘‘చిన్నప్పట్నుంచీ నటించాలనే కోరిక ఉంది. అది ఈ చిత్రంతో నెరవేరింది. సమాజంలో మహిళలు ఎదుర్కొంటున్న సమస్యల నేపథ్యంలో ఈ చిత్రం తెరకెక్కింది. ఇందులో హారర్‌ అంశాల్నీ జోడించాం. కథ ఆద్యంతం ఉత్కంఠభరితంగా సాగుతుంది. వందేమాతరం శ్రీనివాస్‌ సంగీతం సినిమాకి ప్రధానాకర్షణ. నా తదుపరి చిత్రాన్ని కూడా రెండు నెలల్లో మొదలెడతా. దానిలో మంచి పాత్రలో కనిపిస్తా. ఇతర నిర్మాతల చిత్రాల్లోనూ నటించాలనుంద’’న్నారు.